Memeng naika kae RIP

Tun telo raingen go tei kong Memeng Siti pi Kota Surabaya. Umuren puluh buto nong telo, wekin meget, kuat pana kuat hema wata wai.

Langon belen-belen, te kota tukan. Memang anaken tou, mataya ana nuren. Na han di mataya lelaten kae. Memeng nepe leta go tei kong na.

Wulan puasa sampe Lebaran, Agustus 2013, Memeng onen sare hala. Hema wata hala, gan nenu sare hala. Wekin rogita, nikuro heloka riuk amuken.

Ina ama kaka ari naen beto urus Memeng. Mayang dokter, pereksa, na belara hala. Orang tua kae, jadi wekin sare hala. Tite hanya sembang leta Tuhan Allah bantu na. Tite urus na ro terserah Tuhan Allah.

Bidan tou naranen Mbak Puji beto, jaga inak Siti, rema leron. Pona na nenu wai gan senelong. Minggu tou onen sare, minggu rua onen medo, gan nenu bisa hala.

Dokter huda bidan tou nong perawat amalake pasang selang te irungen. Mela le take, go sotek. Tite pasrah, inak nepi wekin kuat loka, Mbak Puji maring.

Lelat hala, Memang Siti naika teti Tuhan Allah langon hari Jumat hulem tanah. Leron ata maten kami metero mai mesikit dahe lango, mian sembahyang Jumat, beng naworo lau kuburan.

Memang maiko kepe. Pana mang sare! Jasa moen go lupang hala. Pi go tei pera pi lango moen, go kian urusan keluarga naen.

Jumat minggu waiken go kai tutung lilin lau kubur. Kubur di tula wati, mungkin leron ribu beng memeng arin urus semen. Memeng turuka kedepa-kedepa nong anaken mata nolo tun puluh lema nong nem kae.


Sent from my BlackBerry® via Smartfren EVDO Network